1. പ്രാർത്ഥന എന്നത് ശൈശവത്തിലെ ഉത്സാഹവും യൗവ്വനത്തിലെ ആശ്രയവും വാർദ്ധക്യത്തിലെ സമാധാനവുമാകുന്നു.
2. ജനങ്ങളുടെയിടയിൽ സത്യം, സന്മാർഗ്ഗാചരണം, വിശ്വാസം, ഭക്തി, പരസ്പര ബഹുമാനം ഇവയെ വളർത്താൻ വിദ്യാഭ്യാസത്തിനെ സഹായിക്കുന്നതത്രെ പ്രാർത്ഥന.
3. നിത്യവും ദൈവപ്രാർത്ഥന ചെയ്യുന്നവൻ ഒരിക്കലും അസത്യവാനോ ദുർമ്മാർഗ്ഗിയോ, അവിശ്വാസിയോ, ഭക്തിഹീനനോ, ജനദ്വേഷിയോ, സ്വാമിദ്രോഹിയോ ആയിത്തീരുന്നതല്ല.
4. ഹൃദയം നിറഞ്ഞ ഭക്തിയോടെ ചെയ്യുന്ന പ്രാർത്ഥന ദൈവം കൈക്കൊള്ളുകയും ഒരു അനുഗ്രഹ രൂപമായി അത് നമുക്ക് തിരികെ ലഭിക്കുകയും ചെയ്യും.
5. ദൈവത്തെ അറിഞ്ഞിട്ടും കൈമലർത്തി തങ്ങൾക്കും തങ്ങൾ ഇഷ്ടപ്പെടുന്നവർക്കും വേണ്ടി പ്രാർത്ഥിക്കുകയില്ലെങ്കിൽ എങ്ങനെയാണ് മനുഷ്യനെ, ഭാവി ലേശം പോലും അറിയാതെ ജീവിക്കുന്ന ബുദ്ധിഹീനങ്ങളായ ജന്തുക്കളെക്കാൾ ശ്രേഷ്ഠനാണെന്ന് പറയുന്നത്?
6. ഈശ്വരപ്രാർത്ഥന ഈ ലോകത്തെ പലവിധത്തിലും ദൈവത്തിന്റെ പാദാരവിന്ദങ്ങളോട് ചേർക്കുന്ന പൊന്നിൻചങ്ങലയത്രെ.
7. രാപ്പകൽ ഭക്തിയോടുകൂടി ഉച്ചത്തിൽ ദൈവത്തെ പ്രാർത്ഥിപ്പിൻ. ഈ പ്രാർത്ഥന നമ്മിലുള്ള ഇരുളു നീങ്ങാനും, തളർച്ച തീരാനും, നമ്മുടെ പരമമായ രക്ഷയും മോക്ഷവും ലഭിക്കാനും ഏറ്റവും ഉത്തമമായ മാർഗ്ഗമാകുന്നു. വിശ്വസിച്ച് പ്രാർത്ഥിച്ച് ദൈവത്തെ ഭജിപ്പിൻ.
8. സമാധാനത്തിന്റെ മനുഷ്യർ ചുരുക്കവും കലഹത്തിന്റെ പുത്രന്മാർ വളരെയും ആകുന്നു. അത് ഒടുക്കക്കാലമാകകൊണ്ടായിരിക്കാം.
9. നാം ചെയ്യുന്നത് ദൈവത്തെക്കുറിച്ച് എന്നിരുന്നാൽ മതി. അപ്പോൾ നമുക്ക് തന്നിൽനിന്ന് പ്രതിപകരം കിട്ടും.
10. ജയിപ്പാൻ മാത്രമല്ല തോല്പാനും പഠിക്കണം. അരമുള്ളവരോട് ഉരമിടണം.
11. ദൈവം സാധുക്കളുടെ ഭാഗത്തുണ്ട്. സകലത്തിലും ദൈവത്തെ ഓർത്തു പ്രവർത്തിക്കുക. അപ്പോൾ സകലവും നമുക്ക് ശുഭമായിത്തീരും.
12. പള്ളിക്ക് കൊടുപ്പാനുള്ളത് വേഗത്തിൽ കൊടുത്തു തീർക്കണം. ആ കാര്യത്തിൽ നിങ്ങൾക്ക് ശുദ്ധമനസ്സുണ്ടായിരിക്കുമെങ്കിൽ മാത്രമേ നിങ്ങളുടെ ഭവനകാര്യവും ശുദ്ധമായിത്തീരൂ. ആ വകയിൽ വല്ല ലാഭമോ എന്തെങ്കിലും ഇങ്ങോട്ട് പറ്റുവാൻ ഇടവരുന്നു എന്നാകിൽ അതും അതിൽ പത്തിരട്ടിയും നിങ്ങളിൽനിന്ന് അന്യർ കൊണ്ടുപോകാൻ ഇടവരികയും ചെയ്യും. അതിനാൽ നിങ്ങളെല്ലാവരും ദൈവാശ്രയത്തിലും സഹോദരസ്നേഹത്തിലും അയൽക്കാരോടുള്ള സംപ്രീതിയിലും നിർമ്മലമുള്ളവരായിരിപ്പിൻ.
13. സ്വല്പലാഭമോ മാനമോ ഇച്ഛിച്ച് സ്നേഹത്തെ വെടിയരുത്. അത് ഭോഷത്വമാകുന്നു. അവസാനം അതിൽ വ്യസനിപ്പാൻ ഇടവരും.
14. പട്ടക്കാരെ ബഹുമാനിച്ചുകൊള്ളണം. പ്രവൃത്തിയിലാകട്ടെ വചനത്തിലാകട്ടെ ഭാവത്തിലാകട്ടെ ഹൃദയത്തിലാകട്ടെ ഒരിക്കലും നിന്ദിക്കുകയോ ആക്ഷേപിക്കുകയോ നിസ്സാരമായി വിചാരിക്കുകയോ അവർക്ക് ചെയ്യേണ്ടുന്ന മുറ ചെയ്യാതിരിക്കുകയോ അവരുമായി വഴക്കു പിടിക്കുകയോ കൊടുക്കൽ വാങ്ങലിൽ അവരുമായി പലിശക്ക് തർക്കിക്കുകയോ ഏതൊരു വിധത്തിലും അവരുടെ മനോദണ്ഡം തങ്ങളുടെമേൽ വരുവാൻ തക്കവണ്ണം കാണിക്കുകയോ ഒരിക്കലും ചെയ്യരുത്. അതുപ്രകാരം തങ്ങളുടെ കാരണവന്മാരോടും തങ്ങളിൽ പ്രിയമുള്ള എല്ലാവരോടും വിചാരിക്കണം.
15. മിടുക്കനാകണ്ടാ – ഭോഷനാകയുമരുത്. ആത്മാവിനേക്കാൾ ശരീരത്തേയും ദൈവത്തേക്കാൾ ദ്രവ്യത്തേയും സ്നേഹിക്കരുത്.
16. ദൈവഭയമില്ലാത്തവർ കൂട്ടുകാരായിത്തീരരുത്. പ്രാർത്ഥനയിൽ താല്പര്യമായി ഇരുന്നുകൊൾക.
17. ക്ഷമയാകുന്നു ബലവും.... ഇഹത്തിലും പരത്തിലും മാനവും. സജ്ജനങ്ങളുടെ ലക്ഷണവും അതാകുന്നു.
18. സകലത്തിലും സത്യക്രിസ്ത്യാനികളുടെ ലക്ഷണത്തിൽ നടക്കുകയും അത് രാവും പകലും മക്കളെ പഠിപ്പിക്കുകയും ചെയ്യുക – അപ്പോൾ സമാധാനത്തിന്റെ പുരുഷന്മാർക്കുള്ള ആ നല്ല അവസാനത്തിലേക്ക് ദൈവം യോഗ്യമാക്കും.
19. വലിയവൻ ചെറിയവൻ; ചെറിയവൻ വലിയവൻ. ഏവരും തന്നത്താൻ അറിയണം.
20. ബലമറിഞ്ഞു നടക്കണം, ബുദ്ധി പഠിക്കണം. ബുദ്ധിമാൻ എന്ന് നടിക്കരുത്.
21. ഗണത്തെ മറക്കരുത്; എല്ലാവരേയും കരുതണം.
22. ദൈവത്തെ ഭയപ്പെടണം; സാത്താനെ പേടിക്കരുത്.
23. ശത്രുവിനേയും സ്നേഹിക്കണം, ബന്ധുക്കളെ ശത്രുക്കളാക്കരുത്.
24. ദൈവത്തോട് ചോദിച്ചു നടക്കുക, പിതാവിനോടും ചോദിക്കുക. പിതാവ് വിട്ടാൽ ദൈവവും വിടും.
25. മറ്റുള്ളവരെക്കാൾ വലിയവൻ എന്നോർക്കരുത്. എത്ര ദരിദ്രൻ ആയാലും തങ്ങളെക്കാൾ അവൻ വലിയവൻ എന്നോർക്കുക.
26. കടം വാങ്ങിപ്പാൻ മടിപ്പിൻ. വാങ്ങിച്ചുപോയാൽ അത് വീട്ടുന്നതുവരെ ഉറങ്ങാതെ ജാഗരണപ്പെട്ടുകൊൾവിൻ.
27. ഉള്ളവൻ ഇല്ലാത്തവനെപ്പോലെ വിചാരിച്ച് പരിശ്രമിക്കണം. വേലയെടുക്കാതിരുന്നാൽ പിത്തം ഉണ്ടാകും. മറ്റുള്ളവർക്കും ദൃഷ്ടാന്തമായിരിക്കണം. അയൽവാസികളേയും അഗതികളേയും സഹായിക്കണം.
28. സ്വല്പത്തിന്മേൽ അത്ര വലിയ കാര്യമായി പിടിച്ച് ദൈവവെറുപ്പും ജനവെറുപ്പും വരുത്തരുത്.
29. ദൈവത്തെ ഓർത്താൽ വ്യസനിപ്പാൻ ഇടവരികയില്ല. ദുർന്നടത്തക്കാരായിരുന്നാൽ നാശത്തിന് വാതിൽ തുറക്കപ്പെട്ടതായിരിക്കും.
30. കൃഷിപ്പിഴകൊണ്ട് ഭീരുക്കളായിത്തീരരുത്. ദൈവത്തിന്റെ ശിക്ഷയെ നമ്മുടെ കുറ്റം നിമിത്തം എന്ന് കണക്കിട്ട് അതിൽ പിറുപിറുപ്പ് കൂടാതെ സന്തോഷിക്കുകയും ദൈവത്തോട് മാപ്പ് ചോദിക്കുകയും അവിടെ തന്നെ മുട്ടിപ്പായി നമ്മുടെ സങ്കടം ബോധിപ്പിക്കുകയും ചെയ്തുകൊൾക.
31. നിഗളമായി യാതൊന്നിലും വിചാരിച്ചുപോകരുതേ. ദൈവം സകല അത്യാപത്തുകളിൽ നിന്നും കാത്തുകൊള്ളുമാറാകട്ടെ. സകലത്തിലും ദൈവഭയത്തെ മുറുകെ പിടിച്ചുകൊൾക. ദൈവം നിങ്ങളെ അനുഗ്രഹിക്കുമാറാകട്ടെ.
32. കർത്താവ് കൊടുത്തുവെങ്കിലല്ലാതെ മറ്റൊരുത്തനാൽ ഉള്ളത് നിറയപ്പെടുന്നതല്ല.
33. വാശിയും വഴക്കും വലിപ്പവും ഭാവവും പള്ളി സംബന്ധമായ കാര്യത്തിൽ ഒരിക്കലും വിചാരിക്കാതെ അവനവന്റെ താഴ്മയെ ശോഭിപ്പിച്ചും, ദൈവത്തിൽ ആശ്രയിച്ചും ബഹുജനങ്ങളെ തൃപ്തിപ്പെടുത്തിയും നടക്കുന്നവർ ഭാഗ്യവാന്മാർ. ദൈവം അവരെ അനുഗ്രഹിക്കുകയും ചെയ്യട്ടെ.
34. സകലത്തിലും മുമ്പായി ദൈവഭയത്തെ ഓർത്തു കൊള്ളണം. നിങ്ങളുടെ നിമിത്തം ആരും വ്യസനിപ്പാൻ ഇടവരരുത്. കഴിയുന്ന ഗുണങ്ങൾ ചെയ്യുന്നതിന് ഉപേക്ഷ വരരുത്. എന്തെന്നാൽ അത് മാത്രമേ അവസാനത്തിൽ സമ്പാദ്യമായി ശേഷിക്കൂ.
35. കഴിയുന്ന ദോഷങ്ങൾ ആരോടും ഒരിക്കലും ചെയ്യരുത്. എന്തെന്നാൽ അത് തനിക്കും സന്തതിക്കും തറവാട്ടേക്കും കേടായി ഭവിക്കും. നോമ്പിലും നമസ്കാരത്തിലും ദാനധർമ്മങ്ങളിലും മുട്ടിപ്പായി ഇരിക്കുക. അത് ഭക്തിയോടും വിശ്വാസത്തോടും കൂടെ പ്രവർത്തിക്കുക.
36. മടിച്ചാൽ പിന്നെ പഠിത്വത്തിന് കയറ്റമുണ്ടാവുകയില്ല. ദൈവഭയത്തെ മുറുകെ പിടിച്ചുകൊള്ളുക. താഴ്മയെ നല്ല ആഭരണമായി ധരിക്കുകയും ചെയ്തുകൊള്ളുക.
37. നിങ്ങളെ പ്രത്യേകമായി സൂക്ഷ്മപ്പെടുത്തുന്നതെന്തെന്നാൽ ആരുതന്നെ ആയാലും വ്യാജമായി സാക്ഷി പറയുന്നത് ആത്മനാശവും കുടുംബനാശവും എന്ന് മാത്രമല്ല സജ്ജനങ്ങളുടെയിടയിൽ വലിയ ആക്ഷേപത്തിന് കാരണവും ആയിത്തീരുന്നതാകയാൽ ഒരിക്കലും അങ്ങനെ ചെയ്തുപോകരുതെന്ന് ഞാൻ നിങ്ങളോട് അപേക്ഷിക്കുന്നു.
38. മരണം എല്ലാവർക്കും വാതുക്കൽ തന്നെ നിൽക്കുന്നുവെന്ന് ഓർത്തു കൊള്ളണമെ. കുടുംബത്തിലുള്ള വൃദ്ധന്മാരും വൃദ്ധസ്ത്രീകളും ആയിരിക്കുന്ന നമ്മുടെ കാരണവന്മാരെ പോഷിപ്പിക്കുന്നതും അവരെ സന്തോഷിപ്പിക്കുന്നതും നമുക്ക് വലുതായ ഒരു നിക്ഷേപമാകുന്നുവെന്നും ഓർക്കണം.
39. മക്കൾക്ക് വിദ്യ ഉണ്ടാക്കിക്കൊടുക്കാമെങ്കിൽ അത് മതി.
40. ആരേയും വ്യസനിപ്പിക്കയും ദുഃഖിപ്പിക്കയും അരുത്. എളിയവന്റെ നിലവിളി ദൈവം കേൾക്കും.
41. ശിക്ഷ ഭക്തിയോടുകൂടി സഹിക്കുന്ന മക്കളുടെമേൽ ആകുന്നു കൃപയെന്ന് ഓർക്കണം.
42. സകലത്തിലും സകലപ്രവൃത്തിയിലും നന്മ മാത്രം വിചാരിക്കുക. മക്കളോടും അതുതന്നെ ഗുണദോഷിച്ചു പഠിപ്പിക്കുക.
43. നിങ്ങൾ സദാനേരവും വേദവ്യാഖ്യാനങ്ങൾ വായിക്കയും നിങ്ങളുടെ പിതാക്കന്മാരായ ഞങ്ങൾക്ക് നിങ്ങളുടെ നിമിത്തം ദൈവത്തിന്റെ സന്നിധിയിലും മനുഷ്യരുടെ മുമ്പാകെയും ബഹുമാനവും യശസ്സും വർദ്ധിപ്പാനായി നിങ്ങൾ നല്ലവണ്ണം നടക്കയും നിങ്ങളുടെ പിതാക്കന്മാരുടെ ചൊല്ലുവിളിയെ പിന്തുടരുകയും വേണം.
44. പ്രകൃതത്താൽ വന്നുപോകുന്നു. പ്രകൃതം സൃഷ്ടിയിലേ ഉള്ളതാകയാൽ കുറ്റം പറയാവതല്ലല്ലോ. നിങ്ങളിലും അതിലധികമുണ്ടല്ലോ.
45. കരവും പാട്ടവും കൊടുക്കാതിരുന്നാൽ വിളവ് കുറഞ്ഞുപോകും. ഗുരുവിന് ദക്ഷിണ ചെയ്യാതിരുന്നാൽ ഗുരുത്വം ഉണ്ടാകയില്ല. മാതാപിതാക്കന്മാരെ ഭക്തിയായി വിചാരിച്ച് പ്രവർത്തിക്കാതിരുന്നാൽ ഒരിക്കലും ഗുണം വരികയുമില്ല. അപ്രകാരവും അതിലധികവുമാകുന്നു ആത്മീയ പിതാക്കന്മാരുടേത്. അവരുടെ പ്രാർത്ഥനകളും കുർബ്ബാന മുതലായ കൂദാശകളും എല്ലാം നിങ്ങൾക്കും നിങ്ങൾക്കുള്ള സകലത്തിനും ആത്മീയ പ്രകാരവും ജഡപ്രകാരവും സകല വാഴ്വുകളുടെ പൂർണ്ണതയ്ക്കും വർദ്ധനവിനും ആയിരിക്കുന്നതാകുന്നു.
46. നിങ്ങളുടെ മക്കളെ, അവർ ദൈവത്തിന്റെ മക്കളായിത്തീരുവാൻ തക്കവണ്ണം അവരെ സത്യവിശ്വാസത്തിലും സത്യ നടപടികളിലും ഭയഭക്തിയിലും അനുസരണത്തിലും സ്നേഹത്തിലും വളർത്തുവിൻ.
47. മാതാപിതാക്കന്മാർക്കും ഗുരുഭൂതന്മാർക്കും സഭയ്ക്കും സഭാപിതാക്കൾക്കും കീഴ്പ്പെട്ടിരിക്കുന്ന മക്കൾ അവരുടെ പിന്നടികളിൽനിന്ന് വിട്ട് ഉല്ലാസങ്ങൾക്കും ആഹ്ലാദങ്ങൾക്കും മദ്യപാനം, വേശ്യാദോഷം, ദുർമ്മാർഗ്ഗം മുതലായ തോന്നിയവാസങ്ങളിലേക്ക് പോകുവാൻ വിടാതിരിക്കുന്നതിൽ തൽക്കാലം അവർക്ക് ദുഃഖവും അവസാനം അവർക്ക് വലിയ സന്തോഷവും ഉണ്ടാകുന്നതാണ്.
48. ഇടയന്റെ ശബ്ദം ഗണ്യമാക്കാതെ കൂട്ടത്തിൽ നിന്ന് തെറ്റിപ്പോകുന്ന ആടുകൾ കുഴിയിലോ ദുഷ്ടമൃഗങ്ങളുടെ കയ്യിലോ അകപ്പെട്ട് നഷ്ടമായിത്തീരുന്നതല്ലാതെ ആട്ടിൻതൊഴുത്തിൽ പ്രവേശിച്ച് ആശ്വസിപ്പാനിടയാകുന്നതല്ല.
49. മാതാപിതാക്കന്മാർക്ക് അനുസരണമില്ലാതെ അവരുടെ ശത്രുക്കളോട് ചേർന്ന് വിരോധികളായിത്തീർന്നാൽ അവരുടെ ശാപത്തിന് പാത്രീഭവിക്കുകയും അവരുടെ അവകാശത്തിന് ഇതരന്മാരായിത്തീരുകയും ഇഹത്തിലും പരത്തിലും അവർ അയോഗ്യന്മാരായിരിക്കുകയും ചെയ്യും.
50. ദൈവികത്തിലും ലൗകികത്തിലും പ്രകാശവും ജീവനും ആയിട്ടുള്ളത് പഠിത്വമെന്നല്ലാതെ അതിന് ശരിയായി വേറൊന്നുമില്ലെന്ന് ഏവരും സമ്മതിക്കുന്നതാകുന്നു.
51. ഹാ! സഹോദരന്മാരെ വരുവാനിരിക്കുന്ന ഭയങ്കരമായ ചോദ്യത്തേയും ന്യായവിധിയേയും പ്രതികാരത്തേയും ഓർത്തു ഭയപ്പെടുവിൻ.
52. ഗുരുവിന് കൊടുക്കാതിരുന്നാൽ വൈദ്യന് കൊടുക്കേണ്ടി വരും. ആവശ്യത്തിങ്കൽ കൊടുക്കപ്പെടാതിരിക്കുന്നത് ശത്രുക്കൾക്കായി സൂക്ഷിക്കുകയാണ്.
53. തിരുസഭയുടെ ഭരണക്കാരും ഇടയന്മാരുമായ നമ്മുടെ കൂട്ടുവേലക്കാരും സഹോദരന്മാരും സഖികളുമേ വരുവിൻ, കർത്താവിന്റെ വേലയ്ക്കായി വേഗം ഒരുങ്ങുവിൻ. റൂഹായ്ക്കടുത്ത യുദ്ധത്തിന് അതിനടുത്ത സകല ആയുധങ്ങളും ധരിപ്പിൻ.
54. ഒന്നിലും നിഗളിക്കരുത്. നിഗളത്തിന്റെ പിന്നാലെ വീഴ്ചയുണ്ട്, തീർച്ച. താഴ്മയുടെ പിന്നാലെ ഉയർച്ചയും.
55. ഭവനച്ഛിദ്രം ഉണ്ടാകുമെങ്കിൽ അപ്പോൾ വേറെ ആകണം. ഭവനച്ഛിദ്രം ഉള്ളിടത്ത് മൂദേവി കേറും. ദൈവം അവിടെനിന്ന് അകലുകയും ചെയ്യും.
56. സഹോദരസ്നേഹത്തിലും ദൈവസ്നേഹത്തിലും ഐശ്വര്യമുള്ളവരായിരിപ്പിൻ. സഹോദരന്മാർ തമ്മിൽ ഒരിക്കലും വഞ്ചന പെരുമാറരുത്. ഐക്യതയിൽനിന്ന് വിട്ടകലുമന്തോറും ദൈവത്തിൽ നിന്നും വിട്ടകലും; നിശ്ചയമാണ്. ദൈവകൃപ കൂടാതെ ഒന്നും ആകുകയില്ലെന്ന് നല്ല ശരത്തിൽ വിശ്വസിച്ച് ഉറച്ചു കൊൾക.
57. നന്മ കൊണ്ടല്ലാതെ തിന്മ കൊണ്ട് ശത്രുവിനെ ജയിപ്പാൻ നോക്കുന്നത് റൂഹായ്ക്കടുത്ത ജ്ഞാനമല്ലല്ലോ. സത്യവാനായ ദൈവത്തിൽ ശരണപ്പെട്ടുകൊണ്ടും സത്യ ആന്തരത്തോടുകൂടിയും ഇറങ്ങിക്കൊള്ളുക. ദൈവം അതിനെ നിറവേറ്റിത്തരും.
58. ദൈവം അകലുമ്പോൾ നഷ്ടങ്ങളും ദുരിതങ്ങളും ഉണ്ടാകും. അപ്പോൾ ആ കാരണം കൊണ്ട്, ഈ കാരണം കൊണ്ട് എന്നൊന്നുമറിയാതെ തങ്ങളുടെ പാപം കൊണ്ട് ദൈവം അകന്നുപോയതിനാലെന്ന് ഓർത്ത് ദൈവത്തെ മുറുകെപ്പിടിക്കുക; താൻ കൃപ ചെയ്യും.
59. നിങ്ങളുടെ സകല നടത്തകളിലും അനുസരണത്തെ പ്രാപിക്കുക. തിരിച്ചറിഞ്ഞ് നന്മയെ സ്നേഹിക്കുക. തിന്മയെ തള്ളിക്കളയുക. മടിയെ ദൂരെ എറിഞ്ഞുകളഞ്ഞ് രാവിലും പകലിലും നല്ല വേലകൾക്കായി ഉത്സാഹിക്കുക.
60. ഉറക്കത്തിൽ നിന്നും മൗനത്തിൽ നിന്നും ഉണരപ്പെടുക. നിങ്ങളുടെ സകല പ്രവൃത്തിയും പിതൃകല്പനയാൽ ചെയ്യപ്പെടുക. ദൈവമായ കർത്താവ് സകലത്തിലും നിങ്ങളെയെല്ലാവരേയും വാഴ്ത്തി അനുഗ്രഹിക്കുമാറാകട്ടെ! (Compiled by Dr. Samuel Chandanappally)
